شمالی پاکستان میں پری مون سون بارشوں کے بعد آنے والے سیلابی ریلوں نے درجنوں افراد کو بہا لیا ہے جس کے نتیجے میں کم از کم نو افراد ہلاک ہو گئے ہیں۔
ضلعی ایڈمنسٹریٹر شہزاد محبوب نے جمعہ کو بتایا کہ ہلاک ہونے والے نو افراد ایک ہی خاندان سے تعلق رکھتے تھے جو خیبر پختونخوا کے دریائے سوات کے کنارے پکنک منا رہے تھے۔ 16 افراد پر مشتمل یہ خاندان علاقے کی سیر کے لیے آیا ہوا تھا۔
محبوب نے وضاحت کی کہ خاندان کے بچے پانی میں تصاویر لے رہے تھے جب اچانک سیلابی ریلا آ گیا، رشتے دار انہیں بچانے کے لیے دوڑے لیکن خود بھی طوفانی ریلے میں پھنس گئے، جسے مون سون کی بارشوں نے مزید شدید کر دیا تھا۔
انہوں نے بتایا کہ نو لاشیں نکال لی گئی ہیں، جبکہ خاندان کے چار افراد اب بھی لاپتہ ہیں اور چار کو بچا لیا گیا ہے۔
اس سے قبل جمعہ کو صوبائی ایمرجنسی سروس کے ترجمان شاہ فہد نے بتایا تھا کہ مختلف ٹیموں میں تقریباً 100 امدادی کارکنوں نے 58 افراد کو بچایا اور بہہ جانے والے سیاحوں کی تلاش جاری ہے۔
فہد نے عوام سے مطالبہ کیا کہ وہ دریائے سوات میں ممکنہ سیلابی ریلے سے متعلق حکومتی انتباہات پر سختی سے عمل کریں، جو موسم گرما اور سرما میں سیاحوں کے لیے ایک مقبول مقام ہے۔
وزیراعظم شہباز شریف کے دفتر سے جاری ایک بیان میں کہا گیا ہے کہ انہوں نے ‘سیاحوں کی ہلاکت پر گہرے دکھ کا اظہار کیا’۔
بیان میں مزید کہا گیا کہ وزیراعظم نے حکام کو دریاؤں اور ندی نالوں کے قریب حفاظتی اقدامات کو مزید مضبوط کرنے کی ہدایت کی ہے۔
دریں اثنا، ریسکیو حکام کے مطابق، گزشتہ 24 گھنٹوں کے دوران مشرقی پنجاب اور جنوبی سندھ میں بارشوں سے متعلقہ واقعات میں کم از کم 10 افراد ہلاک ہو گئے ہیں۔
ہفتے کے آغاز سے ہی پاکستان کے مختلف حصوں میں شدید بارشیں ہو رہی ہیں، جس سے شاہراہیں بلاک اور مکانات کو نقصان پہنچا ہے۔
محکمہ موسمیات کے مطابق، اس ہفتے بارشوں کا سلسلہ جاری رہنے کی توقع ہے کیونکہ ملک میں مون سون کا سالانہ موسم شروع ہو رہا ہے، جو جولائی سے ستمبر تک جاری رہتا ہے۔
تاہم، موسمیاتی پیش گوؤں کا کہنا ہے کہ اس سال مون سون کے دوران پاکستان میں 2022 کے مقابلے میں کم بارش ہونے کی توقع ہے، جب شدید بارشوں نے دریاؤں میں طغیانی پیدا کر دی تھی، جس سے 1,739 افراد ہلاک ہوئے تھے۔
