راولپنڈی: سیکیورٹی فورسز نے پاک-افغان سرحد کے ذریعے دراندازی کی کوشش کرنے والے 30 بھارتی حمایت یافتہ دہشت گردوں کو ہلاک کردیا ہے۔
پاک فوج کے شعبہ تعلقاتِ عامہ (آئی ایس پی آر) نے جمعے کو جاری بیان میں بتایا کہ خیبرپختونخوا کے ضلع شمالی وزیرستان میں پاک-افغان سرحد کے قریب حسن خیل کے علاقے میں یکم اور 2 جولائی، اور 2 اور 3 جولائی کی درمیانی شب بھارتی پراکسی ‘فتنۃ الخوارج’ سے تعلق رکھنے والے ‘خوارج’ (دہشتگردوں) کے ایک بڑے گروہ کی نقل و حرکت کا پتا چلا۔
آئی ایس پی آر کے مطابق، سیکیورٹی فورسز نے دراندازی کرنے والوں کو بروقت اور مؤثر کارروائی کرتے ہوئے روکا اور تمام 30 بھارتی سرپرستی میں کام کرنے والے دہشت گردوں کو جہنم واصل کردیا۔
فوج کے میڈیا ونگ کا کہنا ہے کہ ہلاک دہشت گردوں سے بھاری مقدار میں اسلحہ، گولہ بارود اور دھماکا خیز مواد بھی برآمد ہوا ہے۔
آئی ایس پی آر نے کہا کہ سیکیورٹی فورسز نے غیر معمولی پیشہ ورانہ مہارت، چوکسی اور تیاری کا مظاہرہ کرتے ہوئے ایک ممکنہ تباہی کو روک دیا۔
بیان میں افغان حکمرانوں سے مطالبہ کیا گیا کہ وہ اپنی سرزمین کو پاکستان کے خلاف دہشت گردی کی کارروائیوں کے لیے استعمال ہونے سے روکیں۔
آئی ایس پی آر نے اس عزم کا اعادہ کیا کہ پاکستان کی سیکیورٹی فورسز ملک کی سرحدوں کے دفاع اور بھارتی سرپرستی میں ہونے والی دہشت گردی کے خاتمے کے لیے پرعزم اور ثابت قدم ہیں۔
