وینس: ایمیزون کے بانی اور ارب پتی جیف بیزوس کی کروڑوں ڈالر مالیت کی شادی کی تین روزہ تقریبات کے دوران سیکڑوں مظاہرین نے وینس کی سڑکوں پر مارچ کیا اور ان کی پرتعیش تقریب کے خلاف شدید احتجاج کیا۔
دنیا کے چوتھے امیر ترین شخص بیزوس اور ان کی اہلیہ لارین سانچیز بیزوس نے جمعے کے روز سان جیورجیو کے ایک ویران جزیرے پر نجی تقریب میں شادی کی، جس میں تقریباً 200 مشہور شخصیات نے شرکت کی۔
تاہم، ہفتے کی شام حتمی پارٹی سے قبل، مظاہرین نے وینس کی مرکزی سڑکوں کو بھر دیا اور بینرز اٹھا رکھے تھے جن پر ‘بوسے ہاں، بیزوس نہیں’ اور ‘نہ بیزوس، نہ جنگ’ جیسے نعرے درج تھے۔ ایک اور پوسٹر پر طنزیہ انداز میں لکھا تھا: ‘سیارہ جل رہا ہے، لیکن فکر نہ کریں، یہ رہی لارین سانچیز کے 27 لباسوں کی فہرست۔’
گزشتہ چند دنوں سے، رہائشیوں نے شہر بھر میں اس بات پر غصے کا اظہار کیا ہے کہ وینس پہلے ہی حد سے زیادہ سیاحت، مہنگی رہائش اور ماحولیاتی تبدیلیوں کی وجہ سے آنے والے سیلاب کے مسلسل خطرے سے دوچار ہے۔
مظاہرین میں سے ایک، مارٹینا ورگنانو نے کہا کہ وہ ‘ان امیر لوگوں کے منصوبوں کو برباد کرنے کے لیے یہاں ہیں، جو دوسرے بہت سے لوگوں کا استحصال کرکے پیسہ جمع کرتے ہیں… جبکہ اس شہر کے حالات غیر یقینی ہیں۔’
وینیشین انوائرمینٹل ریسرچ ایسوسی ایشن کے مطابق، بیزوس نے وینس کے تحفظ کے لیے کام کرنے والی تین ماحولیاتی تحقیقی تنظیموں میں سے ہر ایک کو 10 لاکھ یورو (1.17 ملین ڈالر) کا عطیہ دیا تھا۔
تاہم، ایک اور رہائشی فلاویو کوگو، جو ہفتے کے احتجاج میں بھی شامل ہوئے، نے کہا کہ وہ ایک ‘آزاد وینس چاہتے ہیں، جو بالآخر اپنے شہریوں کے لیے وقف ہو۔’ انہوں نے عطیات پر تبصرہ کرتے ہوئے کہا، ‘یہ عطیات محض ایک معمولی رقم ہیں اور ان کا مقصد صرف بیزوس کے ضمیر کو صاف کرنا ہے۔’
احتجاج کے باوجود، وینس کے کاروباری اور سیاسی رہنماؤں نے شادی کا خیرمقدم کیا اور اسے ایک اہم معاشی فروغ قرار دیا۔ میئر لوئیگی بروگنارو نے کہا کہ احتجاج کرنے والے ‘وینس کی تاریخ سے متصادم ہیں، جو تعلقات، رابطوں اور کاروبار کی تاریخ ہے۔’
مرکز-دائیں میئر نے مزید کہا، ‘بیزوس وینیشین ذہنیت کی عکاسی کرتے ہیں۔ وہ مظاہرین سے زیادہ وینیشین ہیں،’ اور امید ظاہر کی کہ بیزوس کاروبار کرنے کے لیے شہر میں واپس آئیں گے۔
ماخذ: نیوز ایجنسیاں
