غزہ میں ڈاکٹرز نے ایک ’خاموش تباہی‘ سے خبردار کیا ہے جو ہزاروں نوزائیدہ اور شیر خوار بچوں کی زندگیوں کے لیے خطرہ بن چکی ہے۔ اسرائیلی ناکہ بندی کے باعث غزہ میں بچوں کے لیے فارمولا دودھ کی سپلائی مکمل طور پر ختم ہو گئی ہے، جس سے ایک سنگین انسانی بحران نے جنم لیا ہے۔
رپورٹ کے مطابق، غزہ میں صورتحال انتہائی تشویشناک ہے جہاں ہزاروں بچے فاقہ کشی کے دہانے پر پہنچ چکے ہیں۔ اسرائیلی ناکہ بندی نے غزہ تک ضروری اشیاء کی ترسیل کو ناممکن بنا دیا ہے، جس میں بچوں کے لیے دودھ بھی شامل ہے۔
اس بحران کی شدت میں مزید اضافہ اس حقیقت سے ہوتا ہے کہ فاقہ کشی کا شکار مائیں خود بھی غذائی قلت کا شکار ہیں اور اپنے بچوں کو دودھ پلانے سے قاصر ہیں۔ اس دوہرے عذاب نے معصوم بچوں کی زندگیوں کو شدید خطرے میں ڈال دیا ہے۔ ڈاکٹروں اور انسانی حقوق کی تنظیموں نے عالمی برادری سے فوری مداخلت کی اپیل کی ہے تاکہ اس انسانی المیے کو روکا جا سکے۔
