غزہ (نیوز ڈیسک) غزہ شہر میں اسرائیلی وحشیانہ بمباری کے بعد تباہی اور بربادی کے مناظر میں امید کی ایک کرن اس وقت روشن ہوئی جب امدادی کارکنوں نے ایک خاتون کو ملبے اور آگ کے شعلوں کے نیچے سے زندہ نکال لیا۔
تفصیلات کے مطابق، یہ دل دہلا دینے والا واقعہ غزہ شہر کے علاقے الزیتون میں پیش آیا، جہاں اسرائیلی فضائیہ نے ایک رہائشی عمارت کو بمباری کا نشانہ بنایا۔ حملے کے نتیجے میں عمارت مکمل طور پر تباہ ہو گئی اور ہر طرف آگ اور دھویں کے بادل چھا گئے۔
فلسطینی دفاعی رضاکار کی جانب سے جاری کی گئی ایک ویڈیو میں ریسکیو آپریشن کے سنسنی خیز مناظر دیکھے جا سکتے ہیں، جس میں امدادی کارکن اپنی جان خطرے میں ڈال کر ملبے اور بھڑکتے شعلوں کے درمیان پھنسی ایک خاتون کو نکالنے کی کوشش کر رہے ہیں۔
کئی گھنٹوں کی جدوجہد کے بعد، رضاکار بالآخر خاتون کو زندہ نکالنے میں کامیاب ہو گئے۔ الجزیرہ کی رپورٹ کے مطابق، خاتون کو فوری طور پر طبی امداد کے لیے اسپتال منتقل کر دیا گیا ہے جہاں وہ ڈاکٹروں کی زیرِ نگرانی ہیں۔
یہ واقعہ غزہ میں جاری اسرائیلی جارحیت کی سنگینی اور اس کے نتیجے میں ہونے والی انسانی تباہی کی عکاسی کرتا ہے، جہاں امدادی کارکن محدود وسائل کے باوجود انسانی جانیں بچانے کے لیے دن رات کوشاں ہیں۔
