کراچی: محرم الحرام کے دوران سیکیورٹی خدشات کے پیش نظر شہر میں بس ریپڈ ٹرانزٹ (بی آر ٹی) گرین لائن سروس 8، 9 اور 10 محرم کو معطل رہے گی۔
جمعہ کو ایک ترجمان نے انکشاف کیا کہ سیکیورٹی خدشات کے باعث کراچی میں بی آر ٹی گرین لائن سروس محرم کی 8، 9 اور 10 تاریخ کو معطل رہے گی۔
ترجمان کے مطابق، 9 اور 10 محرم کو پیپلز بس سروس کے دس میں سے سات روٹس بند رہیں گے۔ انہوں نے مزید بتایا کہ 8 محرم کو پیپلز بس سروس کے پانچ روٹس جزوی طور پر متاثر ہوں گے۔
دریں اثنا، کراچی ٹریفک پولیس نے بھی ان تین دنوں کے لیے ایک تفصیلی ٹریفک ڈائیورژن پلان جاری کیا ہے۔
سوشل میڈیا پر جاری کیے گئے پلان کے مطابق، سیکیورٹی خدشات کے پیش نظر ایم اے جناح روڈ کو گرو مندر سے ٹاور تک بند رکھا جائے گا۔
مسافروں کے لیے متبادل راستوں کا مشورہ دیا گیا ہے۔ ناظم آباد سے آنے والوں کو لسبیلہ چوک سے گارڈن کے علاقے کے ذریعے نشتر پارک پہنچنے کی ہدایت کی گئی ہے۔
لیاقت آباد سے آنے والے مسافر تین ہٹی سے دائیں مڑ کر مارٹن روڈ کے ذریعے آگے بڑھیں۔ جو لوگ حسن اسکوائر سے پی پی چورنگی کا سفر کر رہے ہیں، وہ کشمیر روڈ استعمال کرتے ہوئے جیل فلائی اوور کے نیچے سے سوسائٹی لائٹ سگنل (شاہراہ قائدین) کی طرف جا سکتے ہیں، یا جیل فلائی اوور کا استعمال کرتے ہوئے تین ہٹی اور لسبیلہ چوک کے ذریعے نشتر روڈ پہنچ سکتے ہیں۔
ایک روز قبل وفاقی حکومت نے یوم عاشور کے موقع پر 5 اور 6 جولائی (9 اور 10 محرم) کو عام تعطیلات کا اعلان کیا تھا۔
واضح رہے کہ محرم اسلامی کیلنڈر کے چار مقدس مہینوں میں سے ایک ہے۔ اس کا دسواں دن، جسے عاشورہ کہا جاتا ہے، کربلا کی جنگ میں پیغمبر اسلام حضرت محمد مصطفیٰ ﷺ کے نواسے حضرت امام حسین رضی اللہ عنہ اور ان کے اہل خانہ کی شہادت کی یاد میں منایا جاتا ہے۔
