کینیا: حکومت مخالف مظاہرے خون میں نہا گئے، پولیس کی فائرنگ سے کئی ہلاکتیں
نیروبی: کینیا میں حکومت مخالف مظاہرے ایک بار پھر پرتشدد اور جان لیوا صورتحال اختیار کر گئے ہیں جہاں پولیس نے مظاہرین پر براہ راست فائرنگ کردی جس کے نتیجے میں متعدد افراد ہلاک ہوگئے۔
یہ ملک گیر ریلیاں “صبا صبا” کے نام سے مشہور جمہوریت کے حامی تحریک کی 35 ویں سالگرہ کے موقع پر منعقد کی گئیں۔
تفصیلات کے مطابق، ملک بھر میں ہزاروں افراد سڑکوں پر نکلے اور حکومت کے خلاف نعرے بازی کی۔ صورتحال اس وقت کشیدہ ہوگئی جب پولیس نے مظاہرین کو منتشر کرنے کے لیے طاقت کا استعمال کیا اور گولیاں چلا دیں۔
عینی شاہدین کے مطابق، پولیس کی فائرنگ سے کئی مظاہرین موقع پر ہی دم توڑ گئے جبکہ درجنوں زخمی ہیں۔ ہلاکتوں کی اصل تعداد کے بارے میں متضاد اطلاعات ہیں تاہم آزاد ذرائع نے متعدد ہلاکتوں کی تصدیق کی ہے۔
“صبا صبا” تحریک کا آغاز 7 جولائی 1990 کو ہوا تھا جب کینیا کے عوام نے کئی سال کی آمرانہ حکومت کے بعد کثیر الجماعتی جمہوریت کی بحالی کا مطالبہ کیا تھا۔ اس سالگرہ پر ہونے والے مظاہرے ملک میں بڑھتی ہوئی مہنگائی اور حکومتی پالیسیوں کے خلاف عوامی غصے کا اظہار ہیں۔
